Nov 15, 2010

ஜாதகம் பார்ப்பதில் உங்களுக்கு நம்பிக்கை உண்டா?

பொதுவாக இந்த ஜாதகம் சோதிடம் ஆகியவற்றில் அதிக நம்பிக்கை இல்லாமல் இருந்து வந்தேன். பல வருடங்களுக்கு முன் நடந்த சம்பவம் என்னை நம்ப வைத்துவிட்டது எனலாம்.

என் நண்பனின் சித்தப்பா ஒருவர் திருச்சியில் வேலையில் இருந்தார். இப்போது அவருக்கு வயது 88. அவர் ஆரம்பத்தில் தீவிர கம்யூனிஸ்டாக இருந்தவர். அந்த காலத்தில் போராட்டங்களில் பங்கு பெற்று சிறைக்கு எல்லாம் சென்று வந்தவர். அப்போது அவர் ஒரு தீவிர கடவுள் மறுப்பாளராகவும் இருந்திருக்கிறார். எல்லோரும் ஜாதகம் ஜோசியம் என்று நம்பிக்கொண்டிருந்த அந்த காலக் கட்டத்தில், அவைகள் எல்லாம் பொய் என்று நிரூபிப்பதற்காக ஜாகத்தை பற்றி படித்து ஆராய்ச்சி செய்ய ஆரம்பித்தார். அப்படி ஆரம்பித்தவர் அதிலே மூழ்கி போய் ஜாதகத்தை நம்ப ஆரம்பித்துவிட்டார்.

தெரிந்தவர்களுக்கு, உறவினர்களுக்கு, நண்பர்களுக்கு என்று இலவசமாக ஜாதகம் பார்க்க ஆரம்பித்தார். அவரிடம் பார்த்து வந்தவர்கள் அனைவரும் அவரைப் பற்றி புகழ ஆரம்பித்துவிட்டனர். அவரும் இலவசமாக பார்த்து சொல்வதால் அவரின் பெயர் நன்கு பிரபலமானது. நாங்கள் எல்லாம் எங்கள் நண்பனை கிண்டல் செய்ய ஆரம்பித்தோம். காரணம் அவனின் சித்தப்பா ஜாதகத்தில் நம்பிக்கை ஏற்பட்டவுடன் தீவிர கடவுள் பக்தராகவும் ஆகிவிட்டார். என் நண்பனோ, "நம்புவதும் நம்பாததும் உங்கள் இஷ்டம். வேண்டுமானால் நீங்கள் ஒரு முறை உங்கள் தலையெழுத்தை பற்றி அவரிடம் தெரிந்து கொண்டு வாருங்கள்" என்று எரிச்சலுடன் கூற ஆரம்பித்துவிட்டான்.

அந்த சமயத்தில் என் இன்னொரு நண்பரின் உறவினர் வீட்டில் ஒருவருக்கு கல்யாணம் பேசி முடிவாகி இருந்தது. என் நண்பன் அந்த உறவினர் வீட்டில் என் நண்பனின் சித்தப்பாவை பற்றி சொல்ல, அவர்களும் ஆர்வமாக பெண் ஜாதகத்தையும், பையன் ஜாதகத்தையும் எடுத்துக்கொண்டு அவரிடம் சென்றனர். நாங்களும் அப்போது உடனிருந்தோம்.

இரண்டு பேரின் ஜாதகத்தையும் வாங்கி பொறுமையாக பார்த்தவர்,

"ஜாதகம் எல்லாம் பொருந்தி இருக்கிறது. நீங்கள் தாராளமாக கல்யாணத்துக்கு ஏற்பாடு செய்யலாம்" எனக் கூறினார்.

உறவினரோ, "ஏற்கனவே நாங்கள் கல்யாணத்தேதி குறித்துவிட்டோம். ஜாதகமும் பார்த்துவிட்டோம். இவன் உங்களைப் பற்றி சொன்னான். அதனால் உங்களிடமும் ஒரு முறை காண்பித்து செல்லலாமே என வந்தோம்" என கூறினார்.

அவர் ஓரளவு கோபம் அடைந்தாலும், அதை வெளியே காட்டிக்கொள்ளாமல், "அப்ப என் கிட்ட ஒரு தடவை சரிபார்க்க வந்திருக்கீங்க. சரி, எப்போ கல்யாணம் வைச்சிருக்கீங்க?" எனக் கேட்டார்.

உறவினர் கல்யாணத்தேதியை சொன்னார்.

கேட்டவர், "அந்த தேதியிலா வைச்சிருக்கீங்க. சரி இல்லையே. பேசாம வேறு ஒரு தேதியில் வைங்கள்" என்றார்.

வந்திருந்தவரோ டென்ஷன் ஆகிவிட்டார், "ஏற்கனவே முடிவு செய்து அனைத்து ஏற்பாடுகளும் நடந்து கொண்டு இருக்கிறது. பத்திரிகையும் அடிக்க கொடுத்துவிட்டோம். இப்போ மாற்ற வேண்டும் என்றால் எப்படி? முடியாத காரியம்" என்றார்.

"அப்புறம் உங்கள் இஷ்டம்?"

" சரி, ஏன் கல்யாணத்தேதியை மாற்ற வேண்டும் என்று சொல்கின்றீர்கள்"

" காரணம், அந்த தேதியில் கல்யாணம் வைத்தீர்கள் என்றால், சொந்தக்காரர்கள் ஒரு ஐம்பது பேரைத் தவிர யாரும் கல்யாணத்திற்கு வரமாட்டார்கள். அவர்களும் முதல் நாள் மாலையில் வந்தவர்கள் ஆக இருப்பார்கள்" என்றார்.

இதை கேட்டதும் அனைவருக்கும் கோபம் வந்து விட்டது. கல்யாணம் நடக்க போவது அடுத்து மூன்று மாதம் கழித்து. உறவினரோ மிகப் பெரிய பணக்காரர். ஓரளவு செல்வாக்கு உள்ளவர். பத்திரிகையே 3000 அடித்துள்ளார். அவரிடம் போய் ஐம்பது பேர்தான் வருவார்கள் என்றால் அவருக்கு கோபம் வருமா? வரதா?

கடுப்புடன் அவரிடம் சொல்லாமல் கொள்ளாமல் வந்துவிட்டொம். வரும் வழியில் எல்லாம் அவரைப் பற்றி திட்டிக்கொண்டே வந்தோம், "இவர் என்ன பெரிய கடவுளா? நடப்பதை முன் கூட்டியே சொல்ல?" என்று.

நண்பரின் வீட்டில் திருமண ஏற்பாடு பலமாக நடந்தது. வீடே சந்தோசமாக இருந்தது. கல்யாணத்துக்கு முதல் நாள் இரவு சில சடங்குகள் நடந்தது. குறிப்பிட்ட உறவினர்கள் மட்டும் மாலையே வந்து இருந்தார்கள்.

கல்யாண நாள் வந்தது. அன்று காலை யாருமே மண்டபத்துக்கு வரவில்லை. முதல் நாள் வந்த ஐம்பது பேர் மட்டுமே வந்து இருந்தார்கள்.

"ஏன்?"

கல்யாணம் நடந்த நாள்: மே மாதம் 22ம் தேதி காலை, 1991 வருடம்.

5 comments:

பாலாஜி சங்கர் said...

ராஜீவ்காந்தி படுகொலை செய்யப்பட தினம்

நம்புவதா ? இல்லையா என்ற குழப்பம் கூட சுவாரசியம் தான்
வாழ்த்துக்கள்

Anonymous said...

Fantastic.

என். உலகநாதன் said...

//ராஜீவ்காந்தி படுகொலை செய்யப்பட தினம்

நம்புவதா ? இல்லையா என்ற குழப்பம் கூட சுவாரசியம் தான்
வாழ்த்துக்கள்//

வருகைக்கு நன்றி பாலாஜி சங்கர்

என். உலகநாதன் said...

Fantastic.

நன்றி பிரபு.

Arunachalam said...

I came searching on the topic nambikkai and landed in your page. This incident you have described made me think deeper about this aspect called "faith".

It happens only for few who are open minded and ready to analyse things without any bias or preconceived notion. Any way thanks for sharing.
(Sorry I do not have tamil keyset so I have to comment in english)