Dec 17, 2010

என்னை மன்னித்து விடு! (சிறுகதை)

இந்த இரவும் சண்டையில் முடிந்த எரிச்சலில் நான். தூக்கம் வராமல் புரண்டு புரண்டு படுத்தேன். நிம்மதியாக தூங்கி பல நாட்கள் ஆகிவிட்டது. தினமும் இரவில் சண்டை. அப்படி என்ன தவறு செய்துவிட்டேன் நான்? இன்னொரு பெண்ணுடன் பழகுவது தப்பா? எல்லா இடங்களிலும் நடப்பதுதானே? எத்தனை பேர் இரண்டு கல்யாணம் செய்து கொள்கிறார்கள்?

இப்படி உங்கள் முன் புலம்பிக்கொண்டிருக்கும் என் பெயர் அருண். ஒரு கம்பனியின் மிக உயர்ந்த பொறுப்பில் இருக்கிறேன்?. கை நிறைய சம்பளம். குறையே இல்லாத வாழ்க்கை. நன்றாகத்தான் வாழ்ந்து கொண்டிருந்தோம்?

எனக்கு பிரச்சனை என் செகரட்டரியால் வந்தது. என்ன பிரச்சனை என்று கேட்கின்றீர்களா? செகரட்டரி சுசீலா மிக நல்ல அழகான கேரளப் பெண். இது ஒன்று போதாதா? பிரச்சனை ஆரம்பம் ஆக? அவள் என்னை அலுவலகத்தில் கவனித்துக்கொள்ளும் அழகை நீங்கள் பார்க்க வேண்டுமே? ஒரு மனைவி கூட அப்படி கவனிக்க மாட்டாள்.

ஆனால், என்ன பிரச்சனை என்றால், சில மாலை நேரங்களில் அவள் உண்மையான மனைவி போல் அலுவலகத்தில் நடந்து கொள்வதுதான். பிடிக்கவில்லை என்றால் கண்டிக்க வேண்டியதுதானே? என்று நீங்கள் கேட்பது என் காதில் விழுகிறது.

நான் பிடிக்கவில்லை என்று உங்களிடம் சொன்னேனா என்ன?

என் மனைவி கீதா மிக அழகானவள். ஆசை தீர திருமணத்திற்கு பிறகு காதலிக்கத்தான் செய்தேன். அட்டகாசமான வாழ்க்கைத்தான் வாழ்ந்தோம். 'தோம்மா' ஆம். அப்படி என்றால்? இப்போது... தினமும் சண்டை.

என்னால் அவமானப்படுத்தப்பட்ட ஏதோ ஒரு விஷ ஜந்து கீதாவிடம் என்னைப்பற்றியும், சுசீலா பற்றியும் போட்டுக்கொடுத்து விட்டது. அது உண்மையாய் இருந்தாலும், பொய் என்று எவ்வளவோ வாதாடிப்பார்த்தேன். கீதா நம்பவில்லை.

பிடிக்கவில்லை என்றால் விலகிப்போக வேண்டியதுதானே? என்று நீங்கள் கேட்பது என் காதில் விழுகிறது. விவாகரத்து வாங்கிக் கொள்ள நான் என்ன முட்டாளா என்ன? சொத்து எல்லாம் அவள் பெயரில் அல்லவா இருக்கிறது. மேலும் கீதாவின் அப்பா ஒரு மிகப் பெரிய அரசியல்வாதி. என்னை உயிரோடு விட்டுவிடுவாரா என்ன?

அவர் மட்டும் இல்லை என்றால் இந்த சேரியில் பிறந்த... அதாங்க எனக்கு இவ்வளவு பெரிய பொறுப்பும், பதவியும், சொத்தும் கூடவே அவர் பெண்ணும் கிடைக்குமா? அவர் ஏன் எனக்கு அவர் பெண்ணை கொடுத்தாருனு கேட்கறீங்களா? அவருக்கு அவரோட பெண்ணைவிட சொத்து முக்கியமா பட்டுடுச்சு போல அதான் அவரோட பினாமியான எனக்கு கொடுத்துட்டார்.

அப்ப பேசாமா மூடிட்டு நல்லா வாழ்க்கையை அனுபவிக்கலாம் தானே? ஏன் இப்படி புலம்புறனு தானே கேட்கறீங்க. ஐய்யோ உங்களுக்கு நான் எப்படி சொல்வேன்,

சுசீலாங்க... சுசீலா

ஒரு தடவை அவளை... அப்பத்தான் உங்களுக்கு தெரியும்.ஐயோ என்னவோ தப்பா பேசிட்டேன். மன்னிச்சுடுங்க. சுசீலா எனக்குத்தான். எனக்கு மட்டும்தான்.

எனக்கு சுசீலா வேணும்ங்க. மனைவியா, காதலியோ, தோழியா? ஆனா அதே சமயம் கீதாவோட சொத்தும் வேணுங்க. என்ன செய்யலாம்?

தூக்கம் வருதுங்க. மீதிய காலைல பேசிக்கலாம்.

**********

ஹலோ நேத்து உங்ககிட்ட சொன்னேன் இல்லையா என் பிரச்சனைய. ஒரு வழியா ஒரு முடிவு கிடைச்சுடுச்சு.

காலைல என் பால்ய சிநேகிதன் பாலாவை பார்த்தேன்.

அவனும் நானும் சின்ன வயசுலே இருந்து சேர்ந்து ஒண்ணத்தான் சுத்துவோம். நிறைய தப்பு செஞ்சுருக்கோம். நிறைய பெண்களை சேர்ந்து..... சரி, சரி அது இப்போ முடிஞ்சு போன கதை. விசயத்துக்கு வருவோம். பாலா இப்போ டாக்டரா இருக்கான்.

என்னோட சுத்துனவன் எப்படி டாக்டரானானு கேட்கறீங்களா? அவன் அப்பவே நல்லா படிப்பான். நானும்தான். என்னதான் சின்ன வயசுல அப்படி சுத்துனாலும், நானும் MBA முடிச்சுட்டேன்ல. அதனாலதானே கீதா அப்பாவால எனக்கு பெரிய பதவி வாங்கி தர முடிஞ்சது.

பாலாட்ட விசயத்தை சொன்னேன். அவனாவது திருந்தி இருப்பான்னு பார்த்தா அவனும் அப்படித்தான் இருக்கான் நர்ஸோட. அப்புறமா அவன் அந்த ஐடியா கொடுத்தான்.

"ஏண்டா அருண் கவலைப்படுற? நான் ஒரு மாத்திரை தறேன். அதை பாலுல கலந்து அவளை குடிக்க வைச்சுடு. குடிச்சோன கொஞ்சம் மயக்கம் வறா மாதிரி இருக்கும். அது ஒரு ஸ்லோ பாய்சன் மாத்திரை. கொஞ்சம் கொஞ்சமா அவளை ஒரு மூணு மாசத்துல காலி பண்ணிடும். நீ மாட்ட மாட்ட. ஏதோ நோய் வந்து  அவள் இறந்தது போல ஆகிவிடும். அதுக்கு அப்புறம். நீ சுசீலாவோட ஜாலியா இருக்கலாம்"னு சொன்னான்.

முதல்ல எனக்கு பாவமா இருந்துச்சு கீதா மேல. என் மேல உயிரே வைச்சிருக்கான்னு நினைக்கிறேன். அதுக்காக? சுசீலாவை விடமுடியுமா?

"கீதாவை பிடிக்கும்னு சொல்லற. சுசீலாவையும் பிடிக்கும்னு சொல்லற. அது எப்படி?" உங்களுக்கு சந்தேகம் வருதா?

என்னங்க இது? ஒருத்தருக்கு இட்லி பிடிக்கும்னா, சப்பாத்தி பிடிக்கக்கூடாதா?

சரி விடுங்க. யோசிச்சு முடிவு எடுத்து மாத்திரைய வாங்கிட்டு வீட்டுக்கு வந்துட்டேன். எங்கேயும் போயிடாதீங்க. நான் அவளுக்கு மாத்திரை பாலில் கொடுக்கும்வரை இங்கேயே இருங்க.

இதோ பால் எடுத்துட்டு வந்துட்டா. இரண்டு டம்பளர். எனக்கு ஒண்ணு. அவளுக்கு ஒண்ணு. எப்படி மாத்திரையை போடுவது?

கொஞ்சம் குடித்து பார்த்துட்டு,

"கீதா, பால்ல சக்கரை பத்துல கொஞ்சம் எடுத்து வா?" அவள் எடுத்து வருவதற்குள் கலந்து விடணும்.

ம்ம்ம் இதொ இன்னும் ஒரு வினாடி. அப்பா எப்படியோ கலந்துட்டேன். கீதா வந்தவுடன் சக்கரையை கலந்த டம்ளரை என்னிடம் கொடுத்தாள். மாத்திரைய கலந்த டம்ளரை அவளிடம் கொடுத்தேன்.

குடித்தோம்.

என்ன இது ஒரு மாதிரி இருக்கு????

"குடிச்சோன கொஞ்சம் மயக்கம் வறா மாதிரி இருக்கும்"

இடைச்செறுகல்:


அருணுக்கு மட்டும்தான் பாலா போல பால்ய சிநேகிதன் இருக்கணுமா என்ன?


8 comments:

sriram said...

நச் கதை உலக்ஸ்
அடுத்த சிறுகதைத் தொகுப்பு உங்களோடதுதான் போல

என்றும் அன்புடன்
பாஸ்டன் ஸ்ரீராம்

Anand said...

Super....

என். உலகநாதன் said...

//நச் கதை உலக்ஸ்//

வருகைக்கு நன்றி ஸ்ரீராம்.

//அடுத்த சிறுகதைத் தொகுப்பு உங்களோடதுதான் போல//

பார்ப்போம்!

என். உலகநாதன் said...

//Super....//

நன்றி ஆனந்த்.

பத்மா said...

விறு விறு கதை

என். உலகநாதன் said...

//விறு விறு கதை//

நன்றி பத்மா

Jaleela Kamal said...

கதை நல்ல இருந்தது.

என். உலகநாதன் said...

//கதை நல்ல இருந்தது.//

வருகைக்கு நன்றி ஜலீலா கமல்